ఆంధ్రప్రదేశ్‌ ప్రభుత్వం కొత్త రేషన్‌ కార్డుల పంపిణీపై కీలక నిర్ణయం తీసుకుంది. అర్హులైన వారికి కొత్తగా స్మార్ట్‌ రేషన్‌ కార్డులను మంజూరు చేయనుంది. ఇప్పటివరకు 2 లక్షల మందికి కొత్త కార్డులు మంజూరు కాగా, తిరస్కరించిన దరఖాస్తులు కూడా వేల సంఖ్యలో ఉన్నాయి. ఈ స్మార్ట్‌ కార్డులు అధునాతనంగా, క్యూ ఆర్ కోడ్‌తో, బ్యాంకు ఏటీఎం కార్డు తరహాలో ఉండనున్నాయి. రాజకీయ రంగులు, నాయకుల చిత్రాలు లేకుండా రూపుదిద్దిన ఈ కార్డులు సెప్టెంబరు నెల నుంచి సరుకుల పంపిణీలో ఉపయోగించనున్నారు. ఈ-పోస్‌ యంత్రాల ద్వారా స్కాన్‌ చేసి లబ్ధిదారుల వివరాలు తెలుసుకునే వెసులుబాటు ఉంటుంది. ప్రస్తుతం రాష్ట్రవ్యాప్తంగా 1.46 కోట్లకు పైగా రేషన్ కార్డులు ఉండగా, కొత్తగా మంజూరు చేసే రెండు లక్షల కార్డుల పంపిణీ కోసం సన్నాహాలు జరుగుతున్నాయి.