హైదరాబాద్‌లో ఎంపీ వేమిరెడ్డి ప్రభాకర్‌రెడ్డి కుమారుడిని అంటూ మోసాలకు పాల్పడిన వ్యక్తిని కేపీహెచ్‌బీ పోలీసులు అరెస్ట్ చేశారు. నిందితుడిని గుంటూరు జిల్లాకు చెందిన విక్రాంత్ రెడ్డి అలియాస్ వెంకటేశ్వర్లుగా గుర్తించారు. పోలీసుల వివరాల ప్రకారం, కేపీహెచ్‌బీలో ఓ లేడీస్ హాస్టల్‌లో తన బంధువును చేర్పించిన విక్రాంత్‌ అక్కడి యజమానితో పరిచయం పెంచుకున్నాడు. తాను ఎంపీ కుమారుడినని, జూబ్లీహిల్స్‌లో జ్యూవెలరీ షాపు ఉందని నమ్మించాడు. షాపు రీమోడలింగ్ కోసం ఉపయోగించానంటూ బంగారు గొలుసు, అనంతరం మరింత బంగారం కోసం రూ. లక్ష నగదు తీసుకుని అదృశ్యమయ్యాడు. మోసపోయిన విషయం తెలుసుకున్న హాస్టల్ యజమాని పోలీసులకు ఫిర్యాదు చేశారు. విచారణలో నిందితుడిపై గతంలోనూ 14 మోసాల కేసులు ఉన్నట్లు పోలీసులు వెల్లడించారు.