మైక్రోసాఫ్ట్‌ సహ వ్యవస్థాపకుడు బిల్ గేట్స్‌కు చెందిన అత్యంత విలాసవంతమైన నౌక ‘బ్రేక్ త్రూ’ను త్వరలోనే విక్రయించనున్నారు. ఈ నౌకను సెప్టెంబర్ 24 నుండి 27 వరకు మొనాకోలో జరగనున్న యాట్‌ షోలో ప్రదర్శించి అమ్మే అవకాశముంది. లిక్విడ్ హైడ్రోజన్‌ ద్వారా నడిచే ఈ నౌక సుమారు 390 అడుగుల పొడవు కలిగి ఉండగా, ఇందులో ఏడు డెక్‌లు, బాస్కెట్‌బాల్ కోర్టు, సినిమా థియేటర్, హాట్‌ టబ్‌లు, ప్రైవేట్ ఆసుపత్రి, లగ్జరీ బాల్కనీలు, కార్యాలయాలు, లైబ్రరీలు, అతిథుల కోసం ప్రత్యేక క్యాబిన్లు వంటి విస్తృత సదుపాయాలు ఉన్నాయి. ఈ యాట్‌ను నిర్మించేందుకు నెదర్లాండ్స్‌కు చెందిన ఫెడ్‌షిప్ సంస్థ ఐదేళ్ల పాటు కృషి చేసింది. దీని ఖరీదు దాదాపు 645 మిలియన్‌ డాలర్లుగా ఉండే అవకాశం ఉంది. ఆసక్తికరంగా, ఈ నౌకను కొనుగోలు చేసినప్పటికీ బిల్ గేట్స్‌ ఇప్పటి వరకు అందులో అడుగుపెట్టలేదని సమాచారం.