విదేశీ పర్యటనలో ఉన్న ప్రధానమంత్రి నరేంద్ర మోదీ, గురువారం ఘనా పార్లమెంట్‌లో ప్రసంగించారు. తన ప్రసంగంలో ప్రజాస్వామ్య వ్యవస్థ ప్రాధాన్యాన్ని వివరించిన మోదీ, **భారతదేశాన్ని “ప్రజాస్వామ్యానికి తల్లి”**గా అభివర్ణించారు. భారతదేశంలో 2,500 రాజకీయ పార్టీలు ఉన్నాయని చెప్పారు. ఈ వ్యాఖ్యలపై సభలో సభ్యులు ఆశ్చర్యం వ్యక్తం చేశారు. స్పీకర్ కూడా అదే విషయాన్ని మళ్లీ చెప్పడంతో సభలో నవ్వులు చిందాయి. భారత ప్రజాస్వామ్యంలో భిన్నతలు, చర్చలకు ఉన్న ప్రాధాన్యతను ప్రధాని వివరించారు. “ప్రజాస్వామ్యం మనకో వ్యవస్థ మాత్రమే కాదు, అది మన సంస్కృతి” అని పేర్కొన్నారు. భారతదేశం భిన్న సంస్కృతులకు నెలవు అని, 22 అధికారిక భాషలు, వేలాది మాండలికాలున్నాయని అన్నారు. భారతీయులు ఎక్కడైనా కలిసి పోయే గుణం, మన ప్రజాస్వామ్య మూలాలు సహజంగా అలవరచినవేనని వివరించారు. ప్రధాని ప్రసంగం అంతటా భారత ప్రజాస్వామ్యాన్ని ప్రపంచానికి వివరించే దిశగా సాగింది.