జాతీయ రహదారులపై ప్రయాణించే వాహనదారుల కోసం కేంద్ర రవాణా శాఖ విడుదల చేసిన ఫాస్ట్‌ట్యాగ్ ఏడాది పాస్కి ఆశించిన కంటే ఎక్కువ స్పందన లభించింది. ఆగస్టు 15న దేశవ్యాప్తంగా ఈ పాస్ అందుబాటులోకి రాగానే కేవలం ఒక్క రోజులోనే 1.4 లక్షల మంది వాహన యజమానులు దీన్ని కొనుగోలు చేశారు.ఈ పాస్‌తో ఏడాదికి 200 ట్రిప్స్ వరకు టోల్ చెల్లింపులు లేకుండా ప్రయాణించవచ్చు. దేశంలోని 1,150 టోల్ ప్లాజాలపై ఇది వర్తిస్తుంది. ధర రూ.3,000గా నిర్ణయించగా, వాహనదారులు దీన్ని రాజమార్గ్ యాప్ లేదా నేషనల్ హైవే అథారిటీ వెబ్‌సైట్ ద్వారా యాక్టివేట్ చేసుకోవచ్చు.ఇది జాతీయ రహదారులకే పరిమితం కాగా, రాష్ట్ర రహదారులపై ఇది వర్తించదు. అయినప్పటికీ వాహనదారుల నుంచి దీనికి మంచి ఆదరణ లభిస్తోంది. టోల్ వద్ద రద్దీ తగ్గి, ప్రయాణం సాఫీగా సాగుతుందని వాహనదారులు ఆనందం వ్యక్తం చేస్తున్నారు.