ట్రాఫిక్ ఉల్లంఘనలను నియంత్రించేందుకు మధ్యప్రదేశ్‌లోని ఇందౌర్ జిల్లాలో కీలక నిర్ణయం తీసుకున్నారు. ద్విచక్ర వాహనదారులు హెల్మెట్ లేకుండా పెట్రోల్ బంకులకు వచ్చినా, వారికి ఇంధనం ఇవ్వరని అధికారులు స్పష్టం చేశారు. ఈ నియమం ఆగస్టు 1 నుండి అమల్లోకి రానుంది. రోడ్డు భద్రతపై మంగళవారం జరిగిన సమీక్షలో సుప్రీంకోర్టు మాజీ న్యాయమూర్తి జస్టిస్ అభయ్ మనోహర్ సప్రే సూచనలతో ఈ నిర్ణయం తీసుకున్నారు. ఇందౌర్ జిల్లా కలెక్టర్ ఆశిష్ సింగ్ ప్రకారం, హెల్మెట్ లేకుండా వచ్చినవారికి పెట్రోల్ ఇవ్వటం తప్పు, అందువల్ల సంబంధిత బంకులపై చర్యలు తప్పవన్నారు. ఈ నిబంధనను ఉల్లంఘిస్తే సంబంధిత పెట్రోల్ బంకు యాజమాన్యంపై జైలు శిక్ష లేదా రూ.5,000 జరిమానా లేదా రెండూ విధించే అవకాశం ఉంది. ఇందౌర్‌ను 'క్లీన్ సిటీ'గా నిలిపేందుకు తీసుకుంటున్న చర్యల్లో ఇది భాగంగా ఉంది.