కన్నడ సినీ రంగంలో విషాదం నెలకొంది. కేజీఎఫ్‌ సినిమాలో ‘బాంబే డాన్‌ శెట్టి’ పాత్రతో గుర్తింపు పొందిన నటుడు దినేష్‌ మంగళూరు (63) అనారోగ్యంతో మృతి చెందారు. కొంతకాలంగా చికిత్స పొందుతున్న ఆయన సోమవారం ఉదయం తుది శ్వాస విడిచారు. మంగళవారం సాయంత్రం అంత్యక్రియలు నిర్వహించనున్నారు. నటుడిగానే కాకుండా, దినేష్‌ దాదాపు 200 సినిమాలకు ఆర్ట్‌ డైరెక్టర్‌గా సేవలందించారు. వీర మదకరి, చంద్రముఖి ప్రాణసఖి, రాక్షస వంటి చిత్రాల్లో ప్రత్యేక గుర్తింపు తెచ్చుకున్నారు. ఆయన మృతి పట్ల సినీ ప్రముఖులు సంతాపం వ్యక్తం చేస్తున్నారు.