తియాంజిన్‌ వేదికగా ఆగస్టు చివర్లో జరగనున్న షాంఘై సహకార సంస్థ (SCO) సదస్సుకు భారత ప్రధాని నరేంద్ర మోదీ హాజరయ్యే అవకాశాలపై ఊహాగానాలు వెల్లువెత్తుతున్నాయి. ప్రధాని మోదీ ఈ సదస్సులో పాల్గొననున్నారన్న వార్తలపై చైనా ప్రభుత్వం స్పందించింది. ఈ పర్యటనను స్వాగతిస్తున్నట్లు బీజింగ్ పేర్కొంది. చైనా విదేశాంగ ప్రతినిధి గువా జియాకున్ ప్రకారం, ఈ సదస్సుకు SCO సభ్య దేశాలు సహా 20 దేశాల నాయకులు, 10 అంతర్జాతీయ సంస్థల ప్రతినిధులు హాజరుకానున్నట్లు తెలిపారు. అయితే ప్రధాని మోదీ పర్యటనపై ఇప్పటివరకు భారత ప్రభుత్వం అధికారిక ప్రకటన జారీ చేయలేదు. ప్రధాని మోదీ చివరిసారిగా 2018లో చైనా పర్యటించగా, 2019లో చైనా అధ్యక్షుడు షీ జిన్‌పింగ్‌ భారత్‌లో పర్యటించారు. అయితే 2020లో లద్దాఖ్‌ ఘటన తర్వాత ఇరుదేశాల మధ్య సంబంధాలు చల్లబడ్డాయి. ఈ పరిస్థితుల్లో SCO సదస్సు ద్వారా మళ్లీ ద్వైపాక్షిక సంబంధాల్లో వేడి తగ్గే అవకాశం ఉందని భావిస్తున్నారు.