ప్రయాణికుల భద్రతను మెరుగుపర్చే దిశగా భారతీయ రైల్వే కీలక నిర్ణయం తీసుకుంది. దేశవ్యాప్తంగా ఉన్న 74,000 ప్యాసింజర్ కోచ్‌లు, 15,000 సరుకు రవాణా లోకోమోటివ్‌లలో అత్యాధునిక సీసీటీవీ కెమెరాలను ఏర్పాటు చేయనుంది. ఈ కెమెరాలు గంటకు 100 కిలోమీటర్ల వేగంతో వెళ్తున్నా క్లియర్‌గా చిత్రాలను రికార్డ్ చేయగలవు. ప్రతి కోచ్‌లో ప్రయాణికుల కదలికలు ఎక్కువగా ఉండే ద్వారాల వద్ద 4 డోమ్ కెమెరాలు, లోకోమోటివ్‌లో 6 కెమెరాలు, డ్రైవర్ క్యాబిన్‌కి ప్రత్యేక మైక్రోఫోన్ కెమెరాలు ఏర్పాటు చేస్తారు. ఈ కెమెరాలు STQC సర్టిఫికేషన్‌తో ఉండి, తక్కువ వెలుతురు ఉన్నప్పటికీ నాణ్యమైన ఫుటేజ్ అందిస్తాయి. భవిష్యత్తులో ఈ డేటాను ఆర్టిఫిషియల్ ఇంటెలిజెన్స్ (AI) ద్వారా విశ్లేషించే ప్రణాళికను రైల్వే శాఖ రూపొందిస్తోంది. ఈ ప్రాజెక్టుతో నేరాలను తగ్గించి, ప్రయాణికులకు మరింత భద్రత కల్పించవచ్చని అధికారులు చెబుతున్నారు.