మాజీ క్రికెటర్ శ్రీశాంత్ మళ్లీ వార్తల్లోకి వచ్చాడు. ఇటీవల లలిత్ మోడీ విడుదల చేసిన “చెంపదెబ్బ” వీడియోతో వైరల్ అయిన ఆయన పేరు, ఇప్పుడు సుప్రీంకోర్టులో నడుస్తున్న కేసుతో హాట్ టాపిక్‌గా మారింది. వివరాల్లోకి వెళ్తే – ఐపీఎల్ ఫ్రాంచైజీ రాజస్థాన్ రాయల్స్ తమ ఆటగాళ్లకు యూనైటెడ్ ఇండియా ఇన్షూరెన్స్ కంపెనీ ద్వారా బీమా చేయించింది. 2012లో శ్రీశాంత్ మోకాలికి గాయం కావడంతో, ఫ్రాంచైజీ రూ.82 లక్షల వైద్య ఖర్చు క్లెయిమ్ చేసింది. కానీ బీమా కంపెనీ – ఆయనకు 2011లోనే పాదం బొటన వేలు గాయం ఉందని, అది తెలపలేదని చెప్పి తిరస్కరించింది. ఈ వివాదంపై జాతీయ వినియోగదారుల కమిషన్ రాజస్థాన్ రాయల్స్‌కు అనుకూలంగా తీర్పు ఇచ్చి, బీమా కంపెనీ డబ్బులు చెల్లించాలని ఆదేశించింది. దాంతో ఇన్షూరెన్స్ సంస్థ సుప్రీంకోర్టును ఆశ్రయించింది. ప్రస్తుతం అత్యున్నత న్యాయస్థానం – శ్రీశాంత్ ఫిట్‌నెస్ సర్టిఫికేట్లు, గాయాలకు సంబంధించిన ఆధారాలు సమర్పించాలని సూచించింది. ఇరు వర్గాల వాదనలు విన్న తర్వాతే తుది తీర్పు వెలువడనుంది.