కర్ణాటకలో జీఎస్టీ నోటీసులపై నిరసనగా చిన్న వ్యాపారులు, వీధి వ్యాపారులు టీ, కాఫీ, పాల విక్రయాలు నిలిపివేశారు. డిజిటల్ లావాదేవీలపై భారీగా పన్నులు విధించడం పట్ల ఆగ్రహంతో వారు నల్ల బ్యాడ్జీలు ధరించి నిరసన తెలిపారు. 2021-22 నుండి 2024-25 వరకు UPI లావాదేవీల ఆధారంగా జీఎస్టీ నోటీసులు జారీ కావడం వ్యాపారులను ఆందోళనకు గురి చేసింది. లక్షల్లో పన్ను చెల్లించాల్సి వస్తుందనే భయంతో అనేక మంది 'నగదు లావాదేవీలకే' మళ్లారు. జూలై 25న రాష్ట్రవ్యాప్త బంద్ నిర్వహించనున్నట్లు వ్యాపార సంఘాలు హెచ్చరించాయి. ఈ అంశంపై సీఎం సిద్ధరామయ్య వ్యాపార ప్రతినిధులతో సమావేశం కానున్నారు. సమస్య పరిష్కారానికి ప్రభుత్వం స్పందించకపోతే, నిరసనలు ముదిరే అవకాశముందని వ్యాపారులు స్పష్టం చేశారు.