జూలై 9 (బుధవారం) నాడు దేశవ్యాప్తంగా కార్మిక సంఘాలు భారత్ బంద్‌కు పిలుపునిచ్చాయి. కేంద్ర ప్రభుత్వ విధానాలకు వ్యతిరేకంగా సుమారు 25 కోట్ల మందికి పైగా కార్మికులు ఈ సమ్మెలో పాల్గొననున్నారు. బ్యాంకులు, బీమా, బొగ్గు గనులు, రవాణా, నిర్మాణ రంగాల్లో కార్యకలాపాలు నిలిచే అవకాశం ఉంది. పదికి పైగా ట్రేడ్ యూనియన్లు ఈ బంద్‌లో భాగమవుతుండగా, రైతులు, గ్రామీణ కార్మికులు కూడా మద్దతు ప్రకటించారు. గతంలో సమర్పించిన డిమాండ్లపై స్పందన లేకపోవడంతో ఈ బంద్ చేపడుతున్నట్లు యూనియన్లు స్పష్టం చేశాయి. భద్రతా ఏర్పాట్లను దృష్టిలో ఉంచుకుని పోలీసులు భారీ బలగాలను మోహరించారు. స్కూళ్లు, ఆర్టీసీ బస్సులపై ప్రభావం స్థానిక పాలన ఆధారంగా ఉండే అవకాశం ఉంది. ప్రజలు ముందస్తుగా జాగ్రత్తలు తీసుకోవాలని సూచించారు.