ప్రముఖ దాత, రాజు వేగేశ్న ఫౌండేషన్ డైరెక్టర్ వేగేశ్న ఆనందరాజు (67) ఆదివారం విశాఖపట్నంలో మృతి చెందారు. కొంతకాలంగా అనారోగ్యంతో బాధపడుతూ తుదిశ్వాస విడిచారు. ఆయన కుటుంబంలో భార్య, కుమారుడు, కుమార్తె ఉన్నారు. ఆనందరాజు తన ఫౌండేషన్ ద్వారా దేశవ్యాప్తంగా అనేక ఆలయాల్లో భక్తుల కోసం సదుపాయాలు కల్పించారు. తిరుమలలో రూ.77 కోట్లతో అన్నదాన భవనం, రూ.27 కోట్లతో వాటర్ ప్లాంట్ నిర్మించారు. అలాగే షిర్డీ, ద్వారకాతిరుమల, యాదాద్రి సహా పలు ప్రాంతాల్లో ఆసుపత్రులు, నీటి ప్లాంట్లు, ప్రయాణికుల సదుపాయాలు ఏర్పాటు చేశారు. పశ్చిమగోదావరి జిల్లాలో పేదలకు ఇళ్ల స్థలాలు ఇచ్చి, విద్యార్థులకు విద్యా సహాయం అందించారు. ఆయన మృతి పట్ల పలువురు ప్రముఖులు సంతాపం తెలియజేశారు. తెలుగు రాష్ట్రాలకు ఈ సేవాభావి మరణం తీరని లోటుగా పేర్కొంటున్నారు.