హైదరాబాద్‌: షేక్‌పేటకు చెందిన 67 ఏళ్ల వృద్ధుడు క్రెడిట్‌ కార్డు లిమిట్ పెంచుతామని చెప్పి సైబర్ మోసానికి గురయ్యాడు. హెచ్‌డీఎఫ్‌సీ బ్యాంక్‌ అని చెప్పిన ఒకరు వీడియో కాల్‌ చేసి, లింక్‌ పంపించి స్క్రీన్‌ షేరింగ్‌ ఇవ్వాలని కోరాడు. కాల్‌లో ఉండగానే డిటైల్స్ ఎంటర్ చేయించగా, 2.5 లక్షల వరకు లిమిట్ పెరిగిందని చెప్పి కాల్‌ కట్ చేశారు. కొద్ది క్షణాల్లోనే వృద్ధుడి ఖాతా నుంచి రూ.2.03 లక్షలు డెబిట్ అయ్యాయి. మోసాన్ని గుర్తించిన బాధితుడు వెంటనే సైబర్ క్రైం పోలీసులకు ఫిర్యాదు చేశాడు. కేసు నమోదు చేసిన పోలీసులు దర్యాప్తు ప్రారంభించారు.