బంజారాహిల్స్ రోడ్ నం.10లో బసవతారకం క్యాన్సర్ ఆసుపత్రి ఎదురుగా ఉన్న సుమారు రూ.400 కోట్ల విలువైన ప్రభుత్వ స్థలాన్ని ప్రైవేట్ వ్యక్తులు ఆక్రమించేందుకు చేసిన ప్రయత్నం మళ్లీ విఫలమైంది. ఈ స్థలం సర్వే నంబర్‌ 403లో ప్రభుత్వ భూమిగా ఉండగా, పార్థసారథి, అతని కొడుకు విజయ్ భార్గవ్‌ తమదేనంటూ పలు సార్లు ప్రయత్నాలు చేశారు. ఇప్పటికే వీరిపై మూడు క్రిమినల్ కేసులు నమోదయ్యాయి. తాజాగా మరో రెండు గ్రూపులు స్థలంలోకి ప్రవేశించడంతో ఉద్రిక్తత నెలకొంది. ఇరు వర్గాలు ప్రభుత్వ బోర్డులు తొలగించి తమ సంస్థల బోర్డులు పెట్టడంతో బాహాబాహీ జరిగింది. దాదాపు 10 గంటల హైడ్రామా తరువాత పోలీసులు జోక్యం చేసుకుని పరిస్థితిని అదుపులోకి తెచ్చారు. స్థలాన్ని పరిశీలించిన వెస్ట్‌జోన్‌ డీసీపీ విజయ్‌కుమార్, బంజారాహిల్స్‌ ఏసీపీలు జలమండలి విజిలెన్స్ సిబ్బందిని అప్రమత్తంగా ఉండాలని ఆదేశించారు. షేక్‌పేట తహసీల్దార్‌ అనితారెడ్డి మాట్లాడుతూ – ఈ స్థలం పూర్తిగా ప్రభుత్వ ఆధీనంలోనే ఉందని, ప్రైవేటు వ్యక్తుల యత్నాలను అడ్డుకున్నామని స్పష్టం చేశారు.