జనగామ జిల్లా రఘునాథపల్లి మండలంలోని ఖిలాషాపురం గ్రామంలో అమానవీయ ఘటన చోటుచేసుకుంది. రహదారిపై ఓ వస్త్రంలో చుట్టి వదిలేసిన మగ శిశువును స్థానికులు గుర్తించి వెంటనే పోలీసులకు సమాచారం ఇచ్చారు. ఘటన స్థలానికి చేరుకున్న పోలీసులు శిశువును రక్షించి, చైల్డ్ వెల్ఫేర్ అధికారులకు అప్పగించారు. శిశువును జనగామ ఎంసీహెచ్‌లో చేర్చి వైద్యం అందిస్తున్నారు. పసికందును ఎవరు వదిలి వెళ్లారనే కోణంలో పోలీసులు విచారణ చేస్తున్నారు.