హైదరాబాద్‌లో శుక్రవారం మధ్యాహ్నం నుంచి కుండపోత వర్షం కురిసింది. మియాపూర్, కూకట్‌పల్లి, అమీర్‌పేట, బంజారాహిల్స్, పంజాగుట్ట ప్రాంతాలు జలమయమయ్యాయి. ట్రాఫిక్‌కు తీవ్ర అంతరాయం ఏర్పడింది. పలు ప్రధాన రహదారుల్లో నీటి నిల్వలు ఏర్పడ్డాయి. వర్ష ప్రభావం నగరంతో పాటు రాష్ట్రవ్యాప్తంగా విస్తరించింది. హన్మకొండ, వరంగల్, మహబూబాబాద్, సూర్యాపేట, నల్గొండ, యాదాద్రి, మేడ్చల్, రంగారెడ్డి, మహబూబ్‌నగర్ జిల్లాల్లో కూడా భారీ వర్షాలు నమోదయ్యాయి. వాతావరణ శాఖ హెచ్చరికల ప్రకారం శనివారం కూడా ఉరుములు, మెరుపులు, ఈదురు గాలులతో కూడిన వర్షాలు కురిసే అవకాశం ఉంది. హైదరాబాద్ సహా పలు జిల్లాలకు యల్లో అలర్ట్ జారీ చేసింది. ప్రజలు అప్రమత్తంగా ఉండాలని అధికారులు సూచిస్తున్నారు.