మిర్యాలగూడలో ఆర్టీసీ బస్సు దగ్ధం
నల్గొండ జిల్లా మిర్యాలగూడ మండలం తడకమళ్ల గ్రామంలో పార్క్ చేసిన బస్సును గుర్తుతెలియని వ్యక్తులు అర్ధరాత్రి నిప్పు పెట్టారు. టీఎస్ 05 జెడ్ 0047 నంబర్‌ గల బస్సు వెనుక భాగం పూర్తిగా దగ్ధమైంది. ఘటనను గమనించిన డ్రైవర్, కండక్టర్ వెంటనే ఫైర్ సిబ్బంది, పోలీసులకు సమాచారం ఇచ్చారు. మంటలను అదుపు చేయగా, బస్సు వెనుక టైర్లు పూర్తిగా కాలిపోయాయి. ఈ సంఘటనపై పోలీసులు విచారణ ప్రారంభించారు.
నల్లగొండ: నాగార్జున సాగర్‌లో కృష్ణా నది ఉధృత ప్రవాహం – 26 గేట్ల ద్వారా నీటిని విడుదల
నల్లగొండ: ఎగువ కృష్ణా నుండి నాగార్జున సాగర్ వైపున ప్రవహిస్తున్న కృష్ణమ్మ ఉరకలు సాగర్‌ను నిండు కుండలా మార్చాయి. భారీ వరద ప్రవాహం కారణంగా 26 గేట్లను ఎత్తి నీటిని దిగువకు విడుదల చేశారు. 24 గేట్లను 5 అడుగులు, 2 గేట్లను 10 అడుగులు ఎత్తి నీటిని విడుదల చేసినట్లు అధికారులు తెలిపారు. ప్రస్తుత ఇన్‌ఫ్లో, ఔట్‌ఫ్లో 2,61,972 క్యూసెక్కులుగా ఉన్నాయని, సాగర్ స్పిల్‌వే ద్వారా 2,16,842 క్యూసెక్కులు, కుడి కాలువ ద్వారా 8,529 క్యూసెక్కులు నీటిని విడుదల చేస్తున్నట్లు వెల్లడించారు. నాగార్జున సాగర్ ప్రాజెక్టు పూర్తిస్థాయి నీటిమట్టం 590 అడుగులు కాగా, ప్రస్తుత స్థాయి 587.40 అడుగులు ఉంది. జలాశయంలో ప్రస్తుత నీటి నిల్వ 305.74 టీఎంసీలుగా ఉంది.